أحلي قصة حب (( هبة )) الحلقة الرابعة...

الحلقه الرابعه 

هبه : مصيبه ايه بس يابنتي قلقتيني 
ليلي : انا حامل 
هبه : ايه ؟ ازاي ده 
ليلي : زي مابقولك كده انا حامل
هبه : من مين ؟!
ليلي : من كريم
هبه : دلوقتي بس فهمت انتي ليه كنتي بتقوليلي انه بيتهرب منك
ليلي : بس كريم ميعرفش اني حامل
هبه : مش محتاج يعرف انك حامل كفايه بس انه قرب منك دي في حد ذاتها تخليه ميكملش معاكي تاني
ليلي : طيب وايه الحل دلوقتي
هبه : روحي وكلميه بهدوء
ليلي : فكرك يعني انا معملتش كده روحت وكلمته
هبه : وبعدين
ليلي : طردني من البيت
هبه : الحل التاني وانا عارفه انه صعب عليكي بس هو مافيش غيره ياليلي
ليلي : قولي ايه هو ؟
هبه : تقولي لاهلك
ليلي : لا طبعا مقدرش
هبه : ده الحل الوحيد
ليلي : مقدرش ياهبه انتي مش عارفه انتي بتقولي ايه
هبه : انا قولتلك الحل هو صعب بس مافيش غيره اهلك هايعرفوا يضغطوا علي كريم ويخلوه يجوزك وان شاءالله حتي بعديها بيوم او حتي في نفس اليوم يطلقك المهم بس انك متفضليش كده
ليلي : انا فكرت انزل البيبي
هبه : لا طبعا حرام
ليلي : يعني تنزيلي للبيبي حرام واللي انا فيه ده دلوقتي مش حرام انا تعبت وحاسه اني تايهه ..... اعدت ليلي تعيط وهي مش عارفه تعمل ايه ومنهاره
هبه : ياليلي اهدي بس كل حاجه وليها حل طيب مش يمكن لو كريم عرف انك حامل يحن ويوافق يتجوزك
ليلي : تفتكري كده
هبه : ايوه طبعا افتكر ده ليه لا جربي
ليلي : مسحت دموعها خلاص ماشي لو كده هاروحلوا بكره واقولوا ولو مصدقنيش هاروح انا وهو لاي دكتور ويعرف بنفسه منه
هبه : ايوه كده تمام واهدي بقي كده وان شاءالله خير
...........................................................................
نزلت هبه من عند ليلي بعد مااطمنت عليها تماما واتاكدت انها هديت وبقت كويسه .... نزلت فتحت النت كالعاده اللي مش وراها غيره وفتحت تشوف محمد اللي مبقاش وراها غير انها تقرالوا اي حاجه بيكتبها بس لاقيتوا كاتب حاجات كتير اوي علي صفحته
" كيف تستطيع ان تحب وتكره داخل لحظه واحده
لا اعرف .... لكن هذا مااحسه نحوك "
" كم كذبنا حين قولنا نحن استثناء"
" لم يحدث ان تلونت الدنيا في غيابك .... لم يحدث ابدا "
"انتظرك واعلم انك لن تأتي .... انتظرك واعلم ان الحياه تعاقبني بانتظارك "
" لا اري فيك سوي شخص عالق في ذاكرتي ! لا استطيع محوك كبقيه الاشياء التي مررت بها لم تكن المسأله انت .... بل كانت انا .... احسساك بي سأجده في سواك .... ولكن احساسي بك لن يتكرر ابدا "
هبه اعده عماله تقرا كلام محمد اللي عمال يكتبه علي الصفحه وهي متعلقه بكل كلمه هو بيكتبها وبرغم انه حزين الا انه في حاجه شداها لمحمد غير ان اغلب الكلام اللي بيكتبوا محمد مش من تأليفه الا انه بيعبر عن احساس وجع كبير جوه محمد
دقايق وظهر محمد اون لاين عند هبه
محمد : هاي
هبه : هاي عليك ورحمه الله
محمد : هههههههههههه عامله ايه ياهبه
هبه : الحمدلله انت ايه كل كميه النكد اللي انت كاتبه ده
محمد : عادي بقي سيبك بقولك ايه انا عايز اشوفك
هبه :
محمد : اقفلي بوقك ده
هبه :
محمد : يالهوي علي ام الايموشن ده
هبه : هههههههههههه ليه بس ده عسول خالص وكيوت اوي
محمد : وكيوت كمان لالالا ده بارد اوي
هبه : حرام عليك ده عسول خالص
محمد : طيب ماشي ياستي عسول ... انا عايز اشوفك بجد
هبه : تشوفني ازاي يعني يامحمد
محمد : يعني بصراحه كده انا حابب اعرف هبه دي اللي انا بكلمها شكلها عامل ازاي
هبه : بس يامحمد انا مش هينفع
محمد : بصي ياهبه انا مش هاكدب عليكي ولا هاقولك اصل معجب بيكي من اول ماشوفتك وعايز اشوفك علي الطبيعه والكلام الفارغ ده لا انا هاكون صريح معاكي انا حابب اعرف بس شكل الشخصيه اللي بتكلم معاها وصدقيني مجرد فضول مش اكتر
هبه : طيب لحظه
محمد : ماشي
دقايق .... هبه قد قامت بتغير الصوره الشخصيه لها
محمد : اعد مصدوم
هبه : محمد معاك ايه ؟
محمد : دي انتي ؟
هبه : ايوه ايه وحشه صح
محمد : وحشه ايه بس .... ده انتي موزه اوي بس اول مره اعرف انك محجبه
هبه : احم احم
محمد : بس بجد انتي اموره جدا ربنا يحميكي يابنتي
هبه : ربنا يخليك يابابا
محمد : هههههههههههههه يابنتي انا المفروض تقوليلي ياانكل محمد
هبه : ههههههههههههههه ليه بقي ان شاءالله
محمد : عشان انا عجوز
هبه : بس صورتك بتقول غير كده
محمد : بجد بتقول ايه بقي
هبه : بتقول انك سنك صغير
محمد : طيب تديني كام سنه
هبه : يعني 24 او 25 سنه بالكتير
محمد : ربنا يجبر بخطرك يابنتي
هبه : هههههههههههه معيييش فكه
محمد : بقي دي اخرتها ده انتي شويه كمان تقوليلي الله يسهلك ويحنن
هبه : هههههههههه ها قولي بقي عندك كام سنه ؟
محمد : انا ياستي الشهر الجاي يبقي عندي 19 سنه
هبه : ايه ؟!
محمد : بهزر ياستي انتي كل حاجه كده تاخديها جد الشهر الجاي يبقي عندي 28 سنه
هبه : لا بجد
محمد : اه والله
هبه : المهم بقي يامحمد انا معرفش عنك اي حاجه خالص
محمد : عايزه تعرفي ايه عني
هبه : يعني بتشتغل ولا لا وكنت بتدرس ايه كده يعني
محمد : اولا ياستي انا خريج كليه ألسن قسم فرنساوي والماني وبشتغل في مطار القاهره مترجم
هبه : وااااااااااااااااااو ده انت طلعت مهم بقي يعني بتشتغل مترجم وفي مطار وكمان خريج السن وبتكتب خواطر لالالا ده انت طلعت جامد اوي
محمد : ههههههههههه ياستي ولا جامد ولا حاجه انا واحد عادي جدا
هبه : بلاش تقلل من نفسك انت بجد انسان طموح وكمان بتسعي وبتشتغل وكنت مجتهد في دراستك كل ده حاجه حلوه اوي
محمد : غيرك شايف ان ده قليل اوي .... المهم بقي بما انك طلعتي موزه واموره كده انا بصراحه كنت فاكر انك شبه غفر الصعيد بس طلعتي موزه وعينكي ملونه كمان
هبه : غفر الصعيد
محمد : بهزر علي فكره " انا بقي عايز نبقي اصحاب بجد "
هبه : بعد غفر الصعيد دي مااظنش اننا هنبقي اصحاب خالص يامحمد
محمد : هههههههههههه ليه بس ياجميل
هبه : انت يابني بتقولي اني شبه غفر الصعيد
محمد : والله بهزر خلاص انا بعد كده مش هاهزر تاني عشان انتي بتزعلي
هبه :
محمد : ياهبه خلاص والله بهزر متزعليش خلاص
هبه :
محمد :
هبه :
محمد : كفايه بقي احنا هنقضيها طول اليوم الايموشن العبيط ده
هبه : هههههههههههه
محمد : بقولك بقي قريتي كتاب قواعد العشق الاربعون
هبه : قواعد ايه ؟!
محمد : قواعد العشق الـ40 ده كتاب جامد جدا
هبه : ولا حتي قريت قواعد العشق الـ 20
محمد : ههههههههههه ليه بس ده حتي كتاب جامد جدا
هبه : وانا اقرا عن العشق والحب والكلام الفارغ ده ليه
محمد : لما تقري الكتاب هتعرفي ان الموضوع مختلف تماما وبعدين من امتي الحب كلام فارغ
هبه : انا شايفاه كلام فارغ وبعدين انا والقرايه دونت ميكس خالص
محمد : هههههههههههه ليه بس ده حتي القرايه دي حاجه ممتعه جدا
هبه : لا خالص انا مش بحب القرايه خالص ماليش خلق
محمد : جربي اقري بجد هو حلو جدا وبعدين هو بيتكلم عن العشق الالهي مش العشق والحب اللي انتي فاهماه
هبه : هابقي اشوفوا بس موعدكش اني ممكن اقراه
محمد : ماشي ياستي بس انا ممكن اقولك شويه حاجات من الكتاب ده
هبه : ماشي وبعدين احكيلي انت الكتاب بيتكلم عن ايه
محمد : بصي هو بيتكلم عن الصوفيين والدراويش وبيتكلم عن العشق الالهي والمنجاه وده من خلال شخصين مهمين جدا في التاريخ جلال الدين / شمس التبريزي وفي الروايه بيحكي عن 40 قاعده للعشق الالهي او للوصول للعشق الالهي وبيوريكي الصداقه اللي بتم بين جلال الدين وشمس وايه ده علاقتهم مع بعض كانت حلوه اوي
هبه :
محمد : مالك في ايه ؟
هبه : انا مش فاهمه ولا كلمه صوفيين ايه ؟ ودراويش ايه
محمد : ههههههههههههههه طيب استني هاوريكي قاعده من قواعد العشق ال40 وبعدين انتي لازم تقري الكتاب عشان تفهمي الكلام اللي بقولوا
القاعده الاولي " إن الطريقة التي نرى الله فيها ما هي إلا إنعكاس للطريقة التي نرى فيها أنفسنا. فإذا لم يكن الله يجلب إلى عقولنا سوى الخوف والملامة، فهذا يعني أن قدرًا كبيرًا من الخوف والملامة يتدفق من نفوسنا. أما إذا رأينا أن الله مفعمًا بالمحبة والرحمة، فإنا نكون كذلك"
دي ياستي القاعده الاولي ن قواعد العشق ال40
هبه : امممممممم عامتا هابقي اشتريه واقراه
محمد : وممكن تنزليه من علي النت لو عايزه
هبه : لا هاشتريه احسن
محمد : خلاص ماشي زي ماتحبي
هبه : معلش بقي يامحمد انا هاقفل دلوقتي عشان يدوب انام عشان هاصحي بكره بدري
محمد : ماشي ياجميل تصبحي علي خير
هبه : وانت من اهله سلام
محمد : سلام
...................................................................................................................................................